加拿祖不滿被換嬲爆離場　或步拉舒福特後塵

曼聯喺英超主場3比2擊敗葉士域治，不過阿歷真度加拿祖再爆紀律問題，佢不滿喺上半場打少個下被換走，出場嗰陣嬲爆直接返入更衣室。曼聯領隊魯賓艾摩廉賽後表明會搵佢「照肺」，呢位阿根廷隨時會步拉舒福特被踢走後塵。

曼聯喺完半場前，有柏德列多古食紅牌，打少個下艾摩廉即用後防馬沙拉奧入替加拿祖，但加拿祖就非常不滿，拒絕返後備席而直入更衣室，之後更喺社交網嘅限時動態貼出自己被換走嘅相片，似係無聲抗議，無視球隊需要嘅態度引嚟球迷批評。

對於加拿祖嘅行為，艾摩廉賽後表示：「或者因為天氣又凍又濕？我當時打算踢5-3-1，一定要換走1個人，考慮到應付死球需要，我揀換走加拿祖。」艾摩廉早前多次指責拉舒福特態度有問題，所以冬季轉會窗將佢外借，當佢被追問加拿度嘅態度，艾摩廉就話：「你係將佢聯繫上拉舒福特？我要表達嘅，係我一定會搵加拿祖傾呢個問題，如果你想知嘅話，下次記者會我再同你講。」