比寧咸成西甲公敵？被插「偽君子」衰過小雲

皇家馬德里近期高調向西班牙球證施壓，做法引起其他西甲球隊不滿，巴西前鋒雲尼斯奧斯祖利亞更係「惹火尤物」。不過早前因爆粗食紅牌嘅祖迪比寧咸，近期亦受到口誅筆伐，更被馬略卡球員柏保路馬菲奧插係「偽君子」，衰過「真小人」雲尼斯奧斯。

曼城青訓出身嘅馬菲奧，依家效力馬略卡，上月西超盃就同比寧咸有過小衝突，佢日前接受《La Zona 10》訪問，被問到覺得比寧咸同雲尼斯奧斯邊個「好啲」，馬菲奧就回應：「我發誓會揀雲尼斯奧斯，佢同我都係衝動派，但佢會當面同你嘈，唔似比寧咸喺背後捅人一刀。」

馬菲奧表示：「你唔鍾意我可以直接同我講，但唔好扮晒紳士、扮晒乖寶寶，但喺你背後向住其他人侮辱你，實在太虛偽！你問我鍾意佢哋邊個？我會揀雲尼斯奧斯，至少我知道佢係點樣嘅人。」