海倫想重返意甲　祖記拿玻里爭住要

曼聯前鋒海倫今季表現持續低迷，上陣37場僅入7球及1次助攻，最近1次入波已經係上年12月歐霸盃對柏辛域陀尼亞。根據意大利傳媒爆料，呢位22歲丹麥國腳對於留喺英超搵食已失去信心，打算今夏重返意甲，祖雲達斯、拿玻里都有興趣簽佢。

海倫2023年夏天以7,500萬歐元(約6億港元)轉會費由阿特蘭大加盟曼聯後，一直踢唔出身價，而且表現每況愈下，近期更陷入長達2個半月入球荒，上場英超對葉士域治，即使擔任正選，但踢咗67分鐘就被換走，射門、成功突破、關鍵傳球、成功爭頂、成功地面對抗等數據全部係0，表現令人慘不忍睹。

因此，盛傳海倫有意離隊，最大機會重返意甲，祖雲達斯、拿玻里準備接貨。事實上，以往唔少曼聯球員離隊後都獲得重生，包括現時效力拿玻里嘅前鋒盧卡古、中場麥湯米尼，海倫轉戰意甲都係一項唔錯選擇。

不過，曼聯最少要求5,500萬歐元(約4.4億港元)轉會費，所以估計祖雲達斯、拿玻里只會提出借用。