卡利奧斯復出守龍門　索妻撐場

德乙史浩克04主場1比0擊敗普斯辛蒙斯達，近6場首次保持不失球，原來呢場為史浩克04把關門將，就係卡利奧斯，佢位索妻亦特別入場為老公打氣，慶祝復出。

卡利奧斯對上一次上陣係去年2月尾為紐卡素把關對阿仙奴，結果輸1比4，之後再冇上陣，而佢亦於上季結束後離開紐卡素，至今年1月加盟史浩克04，等到今場，時隔一年終於獲派正選上陣，並踢足全場。

據統計，呢位31歲門將全場作出5次撲救，保持不失球，獲得8.2分全場最高分，經過咁多年，終於洗脫「膠龍」污名。

卡利奧斯依家球場情場兩得意，佢位索妻係意大利體育電視台主持人，2023年公開戀情，同年首位女兒出世，去年求婚成功並完婚，今場復出獲愛妻支持。