新例通過！門將持球多過8秒將被罰角球

周六(1日)舉行嘅國際足協理事會(IFAB)年度會議，正式通過修改守門員球例，以後門將若果「揼波鐘」持過多過8秒，將會被罰輸角球，有關新例會喺夏天嘅世冠盃正式執行。

根據現行球例，龍門如果拎球多過6秒，「理論上」會被判罰間接自由球，但刑罰相對上太嚴苛，令球證好少真正執行。依家新例規定，由龍門接波開始，3秒之後球證就會舉高隻手進行「5秒倒數」，如果數到零都仲未開出，攻方就會得到一個角球機會。

新例今季已經喺「英超2」聯賽同意大利低組別聯賽試行，喺400場「實驗」賽事入面，有75%嘅時間門將會喺5秒內開出，成效明顯。IFAB發言人更以今季白禮頓作客3比1贏曼聯作例子：「奧拿拿喺呢場比賽平均用4.8秒就開波，另一邊門將積臣史迪利就用14.8秒，呢個問題需要解決。」