巴塞大勝登榜首　「羅拔仔」入球創新高

周日(2日)西甲，勢如破竹嘅巴塞隆拿主場4比0大炒皇家蘇斯達，波蘭前鋒羅拔利雲度夫斯基又有進帳，今季各項賽事累積34球，成為佢喺巴塞最「多產」球季，巴塞亦以1分反壓馬德里體育會登榜首！

今場17分鐘，皇蘇就有阿列斯艾路斯當度拉跌單刀嘅丹尼爾奧莫被逐，巴塞把握機會連下兩城，謝拉特馬田同馬克卡沙度入波半場領先2比0。巴塞下半場繼續攻，朗奴阿拿奧祖同羅拔利雲度夫斯基分別入波，最終大勝4比0。

巴塞踏入2025年後狀態巔峰，15場賽事有12勝3和不敗佳績，今季40場比賽攻入124球，更係自1959/60球季嘅皇家馬德里後，西甲球隊單季頭40場比賽最高入球紀錄，當中有34球喺嚟自「羅拔仔」，係呢位36歲前鋒加盟巴塞3季以來，最多入波嘅球季。

巴塞教練費歷克賽後表示：「我哋永遠都係想進攻，用傳球製造威脅，所有球員都渴望入波，呢種心態好好。今場開局有個理想情況(紅牌)出現，但我哋都繼續向對手施壓，呢支球隊非常出色，值得有呢場勝仗。」