尹佩斯首度領軍踢歐聯　要重演23年前好戲

飛燕諾新帥尹佩斯將於周四(6日)凌晨迎來教波生涯第1場歐聯賽事，16強首回合主場對國際米蘭，呢位41歲荷蘭少帥嘅球員時代，曾於2002年足協盃(歐霸盃前身)4強，協助飛燕諾淘汰國米，現時要力爭重演23年前好戲。

尹佩斯上月底重返母會飛燕諾，臨危受命擔任教練，上場荷甲首場領軍僅打和奈梅亨0比0，今仗遇上勁旅國際米蘭，勢必面臨重大挑戰。

不過，呢位經典射手話好興奮：「我迫不及待想迎接教練生涯第1場歐聯比賽，我已經準備好，球員狀態亦非常出色，充滿積極態度。」尹佩斯認為國際米蘭最煞食地方係反擊力強，所以預計飛燕諾比賽期間會取得較多控球時間，但入波機會未必多。

飛燕諾同國際米蘭最近1次歐洲賽交鋒，已經係2002年4月足協盃(歐霸盃前身)4強，飛燕諾首回合作客贏1比0，次回合打和2比2晉身決賽，並擊敗多蒙特，奪得冠軍，尹佩斯當年剛出道就成為捧盃功臣，今次重遇國米，別具意義。