利物浦搵新中鋒　再斟禾夫斯堡射手

利物浦今夏準備物色新中鋒，打算再度斟介禾夫斯堡射手阿莫拉。「紅軍」上季曾經同該阿爾及利亞前鋒有過接觸，不過當時冇傾成，今夏打算再出手，為達雲紐尼斯一旦離隊做準備。

24歲嘅阿莫拉係阿爾及利亞國腳，曾於2023年12月歐霸盃代表聖基萊斯聯上陣對利物浦，攻破「紅軍」大門，之後利物浦曾同佢經理人接觸，不過未有結果，後來阿莫拉選擇轉戰德甲，加盟禾夫斯堡。

阿莫拉今季在禾夫斯堡表現平穩，上陣25次交出9球8助攻，吸引利物浦再度注視，據報會方打算今夏再度出手。

利物浦物色新中鋒，主要係達雲紐尼斯早前獲沙特球隊報價，不過冬季轉會窗期間兩次報價均被利物浦拒絕，但長此落去都好難留住球員，所以為紐尼斯離隊提前早好準備。