般尼茅夫小將獲眾豪門垂青　解約金5億

般尼茅夫今季表現出色，隊中多名球員成為一眾豪門目標，其中年僅19歲後衞甸恩胡積臣，不下5間豪門關注，其解約金為5,000萬鎊(約5億港元)，般茅已準備今夏將佢出售。

英國傳媒報道，身高1.97米嘅荷蘭中堅甸恩胡積臣，祖雲達斯青訓出身，今季加盟般尼茅夫，好快成為主力，上陣25場入2球，關注佢嘅球隊愈嚟愈多，計有拜仁、皇馬、車路士、熱刺同紐卡素。

咁多球隊對佢有興趣，般尼茅夫已經有晒心理準備，今個夏天勢必成為轉會焦點，季初般茅收購胡積臣只用咗1,820萬歐元(約1.5億港元)，若果能以5,000萬鎊出售，都算係大賺一筆。