利物浦收購多蒙特天才翼鋒　處於領先位置

多蒙特天才翼鋒比諾傑坦斯受各大豪門注視，今夏將成為轉會焦點，據報利物浦收購該20歲英格蘭新星處於領先位置，有機會以5,000萬鎊(約5億港元)價錢買入。

德國傳媒報道，曼城青訓出身嘅比諾傑坦斯，被視為查頓辛祖2.0，近年喺多蒙特踢出名堂，上陣95場入16球，受到多支英超球隊垂青，除利物浦外，車路士、熱刺、曼聯同阿仙奴都對佢有興趣，據報利物浦已取得收購許可，而該翼鋒亦希望重返英格蘭足壇，可謂一拍即合。

今場爭奪戰，只有利物浦同阿仙奴穩奪來季歐聯資格，獲得比諾傑坦斯認同，而利物浦不但成績好，主帥施洛更打算在翼鋒位置換血，對比諾傑坦斯更具吸引力，令佢哋喺球員爭奪戰中領先。

另邊廂，多蒙特好大機會來季無緣歐聯，加上財政見紅，急於出售球員套現，但又唔想將球員賣畀拜仁慕尼黑，但出售比諾傑坦斯叫價亦由最高8,000萬鎊回落到5,000萬鎊，利物浦只要爽手啲，比諾傑坦斯就手到拿來。