曼聯頭號收購目標曝光　力斟「爆頭射手」

曼聯今季鋒線球員腳頭無靈，根據法國《隊報》爆料，紅魔鬼已經接觸水晶宮，提出收購對方射手桑馬迪達，據悉水晶宮要求4,000萬鎊(約4億港元)轉會費，金額並唔算高，有望達成交易。

現年27歲嘅桑馬迪達今季為水晶宮各項賽事上陣33場入15球，包括上月初英超作客曼聯，個人梅開二度，吸引紅魔鬼班主拉特克利夫注意，將佢列為收購目標。

呢位前法國「奧運國腳」早前英足盃對米禾爾，被對手起飛腳踢中頭部，幸好已經無大礙，估計月底可以復出，所以曼聯爭取簽入桑馬迪達嘅計劃並冇改變。

曼聯以往曾經向水晶宮收購前鋒韋費特沙夏、後衞雲比沙卡，但都「中伏」，效果未如理想，今次出手買桑馬迪達，難怪唔少球迷都唔睇好。