紐尼斯翻生有望留隊？名記：佢唔憂嫁！

利物浦今季力衝「3冠王」，不過烏拉圭前鋒達雲紐尼斯嘅表現就受到質疑，早前更被領隊施洛公開指責，不過呢位25歲射手近期有回勇迹象，上場聯賽帶領「紅軍」反勝修咸頓，重燃留隊希望。達雲紐尼斯嘅老友記者更表示，大把球會打緊達雲紐尼斯主意，就算要走都「唔憂嫁」。

阿根廷記者邦斯係達雲紐尼斯老友，佢嘅IG帳戶亦獲該烏拉圭前鋒追隨，邦斯日前爆料：「我同紐尼斯傾過，詳情就唔講，不過高普對佢非常器重，呢方面施洛就做唔到。紐尼斯依家向3個冠軍進發，但佢只係想有更多落場時間，目前佢得唔到，紐尼斯收到好多球會斟介，絕對唔使愁。」

達雲紐尼斯今屆各項賽事只入過7球，喺英超亦只有8次正選紀錄，不過佢近期表現回勇，領隊施治都讚：「我覺得紐尼斯已經回復正常，見返最初7、8個月嘅佢，一個非常高效率嘅球員。」