馬體會想翻身？「西甲夏蘭特」成關鍵人物

馬德里體育會將於周四(13日)凌晨歐聯16強次回合，返回主場對皇家馬德里，馬體會首回合輸1比2，今仗想翻身，前鋒阿歷山大索洛夫可能成為關鍵人物。呢位29歲挪威國腳今季聯賽有7個入波係後備上陣射入，屬於西甲球員之中最多，今仗隨時扮演「終極殺手」拯救馬體會。

阿歷山大索洛夫上年夏天由維拉利爾轉投馬體會，踢24場西甲入10球，同另1位新加盟射手祖利安艾華利斯一樣，但索洛夫其中7個入波係後備上陣射入，包括上場西甲對基達菲入替艾華利斯後，主射12碼入網，被譽今季西甲最強「後備殺手」。

值得一提，阿歷山大索洛夫上季效力維拉利爾期間，聯賽主場對皇馬，食出「大四喜」，成為史上第11位單場轟入「銀河艦隊」4球嘅球員，因而有「西甲夏蘭特」之稱。

由於祖利安艾華利斯近況大勇，勢必成為皇馬防線嚴密看管目標，一旦阿歷山大索洛夫獲得上陣機會，或會有更多發揮空間，佢今屆歐聯仲未入波，隨時靠今場開齋，幫馬體會收復失地。