曼聯落實興建10萬人球場　115年奧脫福成歷史

曼聯正式宣布啟動主場重建計劃，將會拆卸有115年歷史嘅奧脫福球場，並興建一座可以容納10萬名觀眾嘅新球場，長遠可以為球會及周邊地區帶來龐大經濟效益。

曼聯早已計劃興建新主場，現時正式拍板，將耗資20億鎊(約200億港元)興建，預計5年後可以落成，屆時成為英國最大球場。球場外型設計已曝光，最搶眼係有三座高達200米嘅高塔，遠在40公里外都可以清楚見到，據悉靈感來自紅魔鬼隊徽嘅「三叉戟」。

會方發表聲明指新主場及發展周邊地區，每年可以為英國帶來73億鎊(約730億港元)經濟效益，吸引180萬名遊客，並創造9.2萬個就業職位，對於整個西北地區有重大貢獻。

不過，新球場未必再叫奧脫福，會方準備出售冠名權，藉此為球會帶來巨額收入。