杜曹首份英格蘭名單　拉舒福特上榜

英格蘭主帥杜曹周五(14日)公布上任後首份名單，備戰本月下旬阿爾巴尼亞及拉脫維亞兩場世界盃外圍賽，冬季轉會窗由曼聯外借到阿士東維拉嘅拉舒福特「脫魔重生」，闊別一年重返「三獅兵團」。

今次點兵共3人重返國家隊，分別係拉舒福特、佐敦軒達臣同列斯占士，首次入選就有丹般恩同利維斯史基利；最矚目當然係「福仔」，佢近年喺曼聯愈踢愈沉，新帥魯賓艾摩廉上任後，更指寧願派63歲守門員教練做後備都唔會用佢，極盡侮辱之能事。

今個冬季轉會窗拉舒福特離開曼聯，外借到阿士東維拉，結果大打爭氣波，上陣9場雖仍未有入波，但就交出4個助攻，獲得杜曹青睞得以重返國家隊。

英格蘭名單

門將：

甸恩軒達臣、比克福特、蘭斯達爾、占士查科特

後衞：

丹般恩、高維爾、馬克古希、列斯占士、安斯干沙、利維斯史基利、利夫拿文度、查洛爾昆沙、基爾獲加

中場：

祖迪比寧咸、伊比爾治伊斯、佐敦軒達臣、居迪斯鍾斯、高爾彭馬、迪格蘭賴斯、摩根羅渣士

前鋒：

查洛保雲、菲爾科頓、安東尼哥頓、哈利卡尼、拉舒福特、蘇蘭基