曼聯執到寶　天才中堅一戰成名

曼聯上場歐霸盃16強次回合主場以4比1大勝皇家蘇斯達，領隊魯賓艾摩廉大膽試用新人，派出18歲中堅艾登希雲擔任正選，呢位小將不負所托，表現備受好評，被視為哈利馬古尼接班人。

由於4位中堅哈利馬古尼、利辛度馬天尼斯、約羅、莊尼伊雲斯都受傷，艾摩廉今場用馬菲斯迪歷特、馬沙拉奧、艾登希雲組成3人防線。艾登希雲獲得擔正，令人大感意外，因為呢位英格蘭U19小國腳剛於2月1日由阿仙奴加盟紅魔鬼，此前僅於英足盃對富咸，英超對阿仙奴後備上陣，估唔到今仗以正選踢足全場，發揮非常穩定，甚至更勝身價達5,000萬歐元嘅馬菲斯迪歷特。經此一役之後，相信艾登希雲將會獲得更多上陣機會。

身高1米89嘅艾登希雲技術全面，除咗司職中堅之外，仲可以勝任防守中場，據悉曼聯僅用100萬鎊就買到呢位新星，真係執到寶。