阿仙奴打算擴建酋長球場　增加收入

曼聯日前宣布興建10萬人新球場之後，阿仙奴亦蠢蠢欲動，打算擴建酋長球場，以增加收入，成本同擴建時間都係主要考慮因素。

酋長球場容量為60,704人，係英超第5大球場，容量排喺佢哋前面計有曼聯、熱刺、韋斯咸同利物浦，曼城正在擴建北看台，完工後容量亦會超過60,000人。

不過阿仙奴唔打算同人哋鬥容量，而係自己計數，擴建球場需要當地議會同倫敦交通局批准，附近地鐵站亦需要資金提高容量，唔係話擴建就擴建。

酋長球場於2006年落成啟用，當年耗資3.9億歐元，亦令阿仙奴一度負重債，為咗還債，阿仙奴喺2006至2013年期間不斷出售主力以維持收支平衡，時任主帥雲格艱苦經營，直至2014年先至鬆綁，有閒錢組軍。