曼聯隊友笑問般費：你畀咗幾多錢球證？

曼聯隊長般奴費南迪斯喺歐霸盃16強次回合連中三元，大勝皇家蘇斯達4比1，按慣例般費賽後可以攞走個波，有曼聯鬼馬隊友喺個波上留言：「你畀咗幾多錢球證？」

般費拎走個波後，喺更衣室畀阿歷真度加拿祖捉住合照，般費個足球上面有多位隊友簽名，其中一個隊友竟然寫住：「你畀咗幾多錢球證？」雖然有講笑成份，但球證判咗2個12碼畀曼聯，都係由般費操刀，佢先有機會上演帽子戲法，般費又確實要多謝球證。

另邊廂，落敗嘅皇家蘇斯達周五(14日)發出公告，讉責今場執法球證偏幫曼聯，仲話喺歐洲賽場咁樣判罰非常可恥。

公告內文指出，球證判兩個12碼畀曼聯，都係「非常可疑」及「不應該存在」，向皇家蘇斯達判罰嘅紅牌亦「很有爭議」，到後來球證想再判12碼畀曼聯，柏德列多古都主動澄清對方冇犯規，證明球證今場判決有幾荒謬。