曼聯好消息　蒙特可復出迎戰李斯特城

曼聯將於周一(17日)凌晨英超作客李斯特城，領隊魯賓艾摩廉透露，因傷缺陣3個月嘅中場美臣蒙特已經準備就緒，可以喺今場賽事候命，並大讚佢係「10號位」最佳人選，將有大把發揮空間。

美臣蒙特自2023年夏天由車路士轉投曼聯後，經常受傷缺陣，佢對上1次為紅魔鬼披甲已經係上年12月對曼城。曼聯作客李斯特城前夕，魯賓艾摩廉話：「大家到時會見到蒙特坐後備席，但佢唔可以踢太長時間，估計踢5分鐘係最好安排，蒙特養傷期間，好努力去克服各種困難，佢係1位天才球員，非常適合343陣式嘅10號位，球隊上下都會支持佢。」

美臣蒙特成「魔」後，曼聯進行咗97場比賽，但佢只上陣33場，加上周薪高達25萬鎊(約250萬港元)，唔少輿論質疑曼聯簽入美臣蒙特係重大錯誤。

另外，由於4位中堅哈利馬古尼、利辛度馬天尼斯、約羅、莊尼伊雲斯仍在養傷，艾摩廉暗示上場歐霸盃16強次回合擔任正選嘅18歲新星艾登希雲，今場英超有望繼續擔正。