抖得66個鐘又上陣！皇馬贏波慶祝都冇力

周日(16日)凌晨西甲，皇家馬德里憑基利安麥巴比梅開二度，作客2比1擊敗維拉利爾。皇馬周中踢完歐聯後，相隔66個鐘頭「被逼」再上戰場，完場後一眾球星攰到冇力慶祝，教練安察洛堤賽後揚言，之後如果再被安排少過72個鐘頭休息，將會拒絕比賽。

皇馬上周中歐聯同馬德里體育會激戰120分鐘後晉級，但周日凌晨又要踢西甲，據報皇馬曾經兩度申請延遲比賽時間被拒絕。皇馬今場7分鐘就被角球攻勢打爆，好在麥巴比發力，17分鐘同23分鐘閃電連入兩球，協助皇馬反勝2比1。完場後麥巴比、祖迪比寧咸等球員攰到趴喺地上，連慶祝都冇力。

安察洛堤賽後表示：「今次係最後一次，如果再有休息時間唔夠72個鐘頭嘅比賽，我哋係唔會出場。我哋2次要求改期，但乜都冇發生，再係咁我哋就罷踢。」西班牙球員協會亦發出聲明，指球員喺比賽之間需要至少72個鐘頭休息，絕對唔可以妥協。