紐卡素大搞！新球場計劃曝光　放棄聖占士

紐卡素近年成績突出，啱啱仲拎埋英聯盃冠軍，球會管理層亦準備好更上層樓，據報即將興建全新65,000座位新球場，預計會獲英國政府支持，同時意味有133年歷史嘅聖占士公園球場將會被放棄。

依家可容納52,000人嘅聖占士公園球場，被譽為英超氣氛最濃厚嘅球場之一，不過紐卡素為增加收入，背後嘅沙特財團早就計劃起一個新球場。英國《每日郵報》報道，紐卡素已決定選址聖占士公園附近嘅Leazes Park作為新球場地址，興建計劃會為當地帶嚟數百個就業機會同刺激經濟，預料會得到政府支持。

由於新球場地點同聖占士公園並冇重疊，所以紐卡素可以一直沿用聖占士，直到新球場落成為止。報道指紐卡素近年受制於英超「盈利及可持續發展條例」，所以就算有沙特「水喉」射住，亦唔能夠隨便動用巨資買人，但只要新球場落成，收入大增後就可以「解除封印」，實現紐卡素躋身歐洲頂流嘅目標。