高圖爾斯返比利時獲撐　劈炮門將變「搞屎棍」

上年因為不滿冇得做隊長，宣布退出比利時嘅泰拔高圖爾斯，近日回歸國家隊引發爭議，代替佢打正選嘅門將卡斯迪爾斯更憤而退出國家隊。高圖爾斯周二(18日)喺記者會大反擊，批評卡斯迪爾斯抹黑，而中場泰利文斯亦撐高圖爾斯，諷刺卡斯迪爾斯係「搞屎棍」。

高圖爾斯表示：「我明白卡斯迪爾斯，因為佢本身係正選，但依家我返咗嚟。比利時足總由第1日已經想我返嚟，我只係決定再次接納，唔存在咩自出自入問題。至於佢話仲有其他不滿，我唔知佢講咩，但如果你想指控人，我諗應該要講清楚個問題喺邊。」

阿士東維拉中場泰利文斯，亦選擇撐高圖爾斯：「我哋唔需要卡斯迪爾斯喺呢個情況下『放炸彈』，球員之間當然有討論過，最重要係高圖爾斯已經向隊友解釋清楚。」卡斯迪爾斯上星期批評高圖爾斯可以隨便選擇係咪代表比利時，指足總處事不公，所以決定唔再為國家隊效力。