【官宣】祖雲達斯聘杜陀教半季　做廉價勞工

意甲勁旅祖雲達斯周日(23日)宣布，上年先上任嘅教練莫達被辭退，並且閃電聘請克羅地亞名將杜陀執教，呢位前祖雲達斯球星只簽約半季，人工僅50萬歐元，屬廉價勞工。

據意大利傳媒報道，杜陀同祖記簽約到季尾，如果佢幫球隊拎到歐聯資格，有權將合約延長多1年。消息指杜陀半季人工係50萬歐元，如果最終續約，年薪會提升至200萬歐元。

46歲嘅杜陀，球員時代曾於1998至2007年效力祖記，並於2020至21年擔任助教，之後執教過3支意甲球隊烏甸尼斯、維羅納、拉素，但成績麻麻。盛傳祖記真正目標，係喺夏天邀請前意大利國家隊領隊文仙尼執教。