臨時工變長工　巴塞想同施捷斯尼續約

原本只係以臨時工加盟巴塞隆拿嘅波蘭門將施捷斯尼，將有機會轉做長工，據報巴塞希望同呢位老牌門將續約1年。

34歲嘅施捷斯尼本來去年夏天離開祖雲達斯後已經掛靴，但去年10月達史特根受傷長抖，施捷斯尼被巴塞成功游說復出把關，經過大半季比賽深受主帥費歷克信任，費歷克承諾就算達史特根4月復操，都會畀施捷斯尼把關至季尾。

西班牙傳媒報道，巴塞希望施捷斯尼留隊，將會開出1年合約，交由球員本人考慮，施捷斯尼加盟巴塞後未提出任何要求，亦唔一定要做正選，即使要同達史特根競爭都會接受，佢唯一考慮係是否再度掛靴陪伴家人，但佢亦指喺巴塞感覺舒服。