女友支持轉會　達雲紐尼斯去沙特搵真銀

英超奪冠在望嘅利物浦今夏極可能大換血，烏拉圭前鋒達雲紐尼斯係主帥施洛清洗對象之一，而達雲紐尼斯喺女友支持下亦打算離隊，下一站極可能係沙特豪門球隊，去中東搵真銀。

早在今個冬季轉會窗，沙特豪門艾納斯曾向利物浦探盤，希望簽入達雲紐尼斯，報價7,000萬鎊轉會費，個人條件更係吸引，周薪高達40萬鎊，不過當時利物浦正在英超全力衝冠，所以拒絕對方，達雲紐尼斯知道此事後一度對球隊產生不滿。

如今利物浦英超冠軍在望，會方開始計劃未來，達雲紐尼斯已被列入今夏出售名單，而達雲紐尼斯女友雷娜馬尼亞斯亦支持轉會，希望轉換環境過新生活，更聯同經理人合作尋求新球會，因此睇嚟達雲紐尼斯今夏轉戰沙特機會唔低。