拉舒福特又入波　改踢箭頭更加醒

周四(3日)凌晨英超，阿士東維拉作客3比0大破白禮頓，英格蘭前鋒拉舒福特又有波入，近2場改踢正箭頭後已入3球，維拉領隊艾美利表示會繼續開發佢做前鋒，幫拉舒福特事業更上層樓。

維拉上半場同白禮頓悶和0比0，但下半場大爆發，拉舒福特、馬高阿辛斯奧同唐耶爾馬倫3位冬季加盟新兵各入1球，助維拉大勝3比0升上第7位，只落後排第4名嘅曼城3分，仍有機會殺入前4。

加盟維拉後一直踢左翼嘅拉舒福特，近2場取代奧尼屈堅斯做箭頭，2場就有3球進帳，艾美利表示：「上場搵佢試踢前鋒，今場想繼續試驗，佢可以同屈堅斯競爭，亦可以一齊合作，最重要係拉舒福特覺得有信心，我哋想盡量展現佢嘅能力。」

拉舒福特喺曼聯亦曾擔任前鋒，但表現令人失望，被指最適合嘅位置係左翼，但維拉證明只要戰術配合恰當，拉舒福特踢前鋒可能更加醒神！