維拉7連勝創紀錄　強勢挑戰PSG

阿士東維拉近期氣勢如虹，周日(6日)凌晨英超主場2比1擊敗諾定咸森林，各項賽事錄得7連勝，創下球隊近44年頂級賽事最長連勝紀錄，為周四(10日)凌晨歐聯8強首回合作客巴黎聖日耳門注下強心針。

維拉狀態大勇，13分鐘就由摩根羅渣士先開紀錄，2分鐘後唐耶爾馬倫拉開到2比0，不過佢哋之後放軟手腳，57分鐘被森林嘅祖達施華禁區內射入，好在維拉最後堅守城池，贏2比1全取3分。

維拉由3月開始至今各項賽事7連勝，歐聯晉級8強、英足盃殺入決賽、聯賽亦喺前4爭逐集團之內。維拉喺2019年曾經踢出10連勝，但當時佢哋係踢英冠，喺頂級賽事7連勝，對上一次已經係1981年3月。

入球功臣摩根羅渣士賽後表示：「我哋知道要喺英超殺入前4，今場係非勝不可，球隊依家狀態好好，可以充滿信心咁去巴黎，希望可以有好成績。巴黎聖日耳門係世界最好球隊之一，但我哋入8強都有原因，好期待呢場比賽。」