李斯特城15歲新星亮相　着特別版波衫落場

李斯特城喺英超創下羞家紀錄，不過74分鐘亦出現令主場球迷歡呼嘅畫面，因為只得15歲嘅新人蒙加首度喺英超亮相，成為英超史上第2年輕上陣球員，可能會係李斯特城重建嘅希望。

蒙加喺74分鐘入替，以15歲271日之齡成為英超第2年輕上陣球員，僅次於阿仙奴嘅尼華尼利(15歲181日)喺2022年9月創下嘅紀錄，呢位翼鋒落場後每次掂波都獲球迷歡呼，成為李城今場僅有亮點。

蒙加今場件波衫與眾不用，心口並冇印上贊助商，因為李城嘅贊助商係網上博彩公司，而蒙加因為未夠合法年齡參與賭博，所以唔能夠着有博彩宣傳嘅波衫落場。

李斯特城領隊雲尼斯達萊賽後表示：「你可以睇到佢有頂級才華，佢係個高速嘅翼鋒，有神奇嘅天賦，值得獲得出場時間，希望佢之後有更多機會落場表演。」