等捧盃？車路士用新人夠殺　3球炒歷基亞

車路士喺歐協聯大超班，周五(11日)凌晨8強首回合作客歷基亞，派出大量後備同新人下照贏3比0，次回合返主場變例行公事。19歲小將泰列基佐治攻入升上一隊後第1球，表現大獲好評。

車路士今仗半力出擊，高爾彭馬亦只踢半場就被換走，「藍戰士」就靠泰列基佐治49分鐘打破僵局，加上後備上陣嘅馬度基梅開二度，作客輕鬆大勝3比。

由歐協聯開始嗰刻，車路士已經被睇好「贏硬」，佢哋喺聯賽階段到淘汰賽亦錄得9連勝，今場8強戰作客照用新人，就知領隊馬利斯卡都覺得「坐定粒六」。

泰列基佐治喺英超未踢過正選，但喺歐協聯就第6次正選上陣，馬利斯卡賽後大讚：「好開心，因為佢係車路士『親生仔』，佢踢得好好，又肯承擔責任，我覺得佢踢中路會更加出色。」