阿仙奴教練團全體續約　最重要係呢個人

阿仙奴今季喺傷兵滿營下，英超排喺第2位，歐聯亦已殺入8強，阿迪達為首嘅教練團表現獲得肯定。據《倫敦標準晚報》報道，死球教練祖華等5名教練團，全部都同阿仙奴續約至2027年夏天，繼續輔助阿迪達。

5名教練包括助教史杜雲保、教練古斯達、摩連拿、門將簡拿同死球教練祖華，其中以祖華嘅續約最令球迷興奮，阿仙奴嘅角球威力令人聞風喪膽，祖華就係幕後大功臣。5位教練都係由阿迪達親自邀請加盟，係阿迪達心腹。

阿迪達上年夏天同阿仙奴續約至2027年，當時佢已表示希望教練團一齊續約：「我想大家一齊續約，但要4、5個人同時答應續約唔係易事，我好珍惜呢班戰友，希望可以一直合作。」早前有傳阿積士想搵史杜雲保擔任主帥，今次續約就粉碎傳言。