哥帥激讚水晶宮新星　佢係迪布尼接班人?

曼城將於周六(12日)晚英超主場對水晶宮，賽前「藍月亮」領隊哥迪奧拿大讚對手中場禾頓，似乎有意簽入呢位21歲英格蘭新星，接替今夏離隊嘅奇雲迪布尼。

哥迪奧拿出席賽前記者會，特別點名稱讚禾頓：「佢係1位控球能力極之出色嘅中場，屬於1位非常優秀嘅左腳球員，並且已入選英格蘭國家隊。」禾頓出身於布力般流浪青訓系統，並於2022至24年為球隊踢過英冠，上年2月被水晶宮以1,800萬鎊(約1.8億港元)收購，更加爆冷晉身英格蘭大國腳，參加上年歐國盃，估計禾頓現時身價起碼值5,000萬鎊(約5億港元)。

哥迪奧拿正在為奇雲迪布尼物色接班人，禾頓可能成為曼城今夏收購目標。