曼聯計劃出售8人籌2億鎊　奧拿拿可能去沙特

根據英國《鏡報》爆料，曼聯計劃今夏大換血，出售8位球員，籌集2億鎊(約20億港元)收購新兵，近期表現備受批評嘅門將奧拿拿，可能被賣去沙特阿拉伯。

據悉曼聯出售球員名單包括阿歷真度加拿祖、卡斯米路、明奈、奧拿拿，以及現時被外借出去嘅拉舒福特、安東尼馬菲奧斯、查頓辛祖、杜維爾馬拉西亞，其中卡斯米路、奧拿拿可能轉投沙特阿拉伯球隊。

如果曼聯成功將上述8位球員「散貨」，估計可以獲得2億鎊收入，加上中場基斯甸艾歷臣將於今夏約滿離隊，紅魔鬼仲可以慳番一大筆人工支出。

曼聯內部人士透露，球會出售安東尼馬菲奧斯、查頓辛祖等貴價球星，無可避免會錄得巨額虧損，但為咗令領隊魯賓艾摩廉有資金簽入所需要球員，更有效執行戰術，都必須認痛蝕賣，球隊先至有機會重生。