古拉斯戴帽創紀錄　「車仔條款」轉戰英超？

多蒙特喺歐聯8強次回合3比1擊敗巴塞隆拿，雖然難逃出局命運，但連中三元嘅前鋒古拉斯就人氣爆燈，佢以13個入波排歐聯射手榜第1位，打埋艾寧夏蘭特同羅拔利雲度夫斯基嘅紀錄。據報佢合約內有神秘條款，下季有望轉戰英超！

古拉斯上年由史特加轉投多蒙特後，今季各項賽事已入28球，包括喺歐聯轟入13球。多蒙特歷來單屆歐聯入球紀錄，係艾寧夏蘭特(20/21)同羅拔利雲度夫斯基(12/13)共同保持嘅10球，呢位幾內亞前鋒打破紀錄之餘，亦成為歐聯史上單屆最多入波嘅非洲球員。

據德國《圖片報》報道，古拉斯一直夢想進軍英超，雖然佢同多蒙特嘅合約去到2028年，但原來當中有特別條款，列明6支歐洲豪門有權用7,000萬歐元轉會費將佢收購，其中一隊就係車路士，而呢個條款會喺夏天世冠盃之後生效。