仲有王法？麥巴比收山腳獲輕判　有得對巴塞

皇家馬德里早前不斷控訴被西甲賽會針對，不過佢哋最近就獲「關照」引起爭議，法國前鋒基利安麥巴比上場聯賽施展「收山腳」食紅牌，原本被指可能會「加監」長期停賽，但西甲周二(15日)宣布輕判，只罰麥巴比停賽1場，被巴塞隆拿媒體稱為「醜聞」！

麥巴比喺上場對艾拉維斯，用「收山腳」踩向對手腳脛被罰紅牌，而且明顯係報復性傷人而唔係搶波，賽後傳媒一致認為麥巴比有機會被追加刑期，原本因粗野犯規食紅牌，一般係停賽3場，但西甲賽會以球證報告指麥巴比「搶波時有力過度」為由，只判罰最輕微嘅1場停賽。

麥巴比會喺下周一(21日)凌晨對畢爾包一仗服刑，但之後對基達菲，以及最重要嘅西盃決賽對巴塞隆拿，麥巴比都可以候命上陣。西班牙《世界體育報》就以「醜聞！麥巴比僅停賽1場」為頭條報道。皇馬中場祖迪比寧咸早前因向球證「爆粗」被罰停賽2場，麥巴比用收山腳危害對手反而只停1場，令球迷搲晒頭。