伊基迪基傳投紅軍　法蘭克福「賣」出個未來

德甲勁旅法蘭克福今季表現突出，喺德甲排第3位有望拎歐聯資格，喺歐霸盃亦已殺入8強，人氣前鋒伊基迪基盛傳將喺夏天轉投利物浦，不過法蘭克福球迷就未驚過，事關佢哋一直靠「賣星」建軍，而且愈賣愈勁！

法蘭克福喺冬季轉會窗，將半季入15球嘅馬莫殊以7,500萬歐元賣去曼城，以為失去主力會冧檔，法國前鋒伊基迪基就成功上位，今季各項賽事已入21球，據足球網站《TEAMtalk》報道，利物浦準備動用8,500萬歐元搶人，而紐卡素、阿仙奴等豪門亦虎視眈眈。

法蘭克福最擅長「造星」，2年前以8,500萬歐元賣高路梅安尼去巴黎聖日耳門，之前亦曾捧起盧卡祖域、施巴斯坦賀拿等前鋒，兩人賣走嗰陣都嚟超過5,000萬歐元轉會費，法蘭克福總監夏鄧治表示：「我哋財力唔係最好，但用自己嘅方法行正確嘅路，我哋留唔住球星，但可以用短時間拉到出色嘅球員，幫佢哋展示自己最好一面。」