梅拿最後1場歐聯　失機遺憾告別

拜仁慕尼黑喺歐聯8強次回合僅打和國際米蘭2比2，兩回合輸3比4出局，成為35歲老將湯馬士梅拿最後1場歐聯比賽，呢位德國中場補時近門失機，未能為球隊總比數扳平，帶住遺憾告別。

湯馬士梅拿未獲拜仁續約，踢埋今夏世冠盃後，就會離隊，結束17年拜仁一隊生涯。拜仁主帥高柏尼似乎有「預感」球隊會出局，今場畀湯馬士梅拿擔任隊長，並踢足全場，佢亦交足功課。

戰至補時，湯馬士梅拿近門頭槌迎頂，但欠缺力度，被國米門將恩尼森馬接住，拜仁慕尼黑錯失入波良機後，亦黯然出局。湯馬士梅拿效力拜仁17年，曾經2次奪得歐聯冠軍，以及2次亞軍，現時正式劃上句號。

另外，拜仁出局之後，今屆5支參加歐聯嘅德甲球隊全部被淘汰，4強剛好由英、西、意、法球隊瓜分，德甲遭網民嘲諷已淪為歐洲第5聯賽。