近12場創造10球　米基爾馬連奴成「廠王」

阿仙奴可以打入歐聯4強，「假9」米基爾馬連奴居功厥偉，佢繼8強首回合入波之後，今場次回合又貢獻2次助攻，近12次為兵工廠上陣，合共創造10球，包括射入7球及3次助攻，成為球隊進攻靈魂人物，可堪稱為「廠王」。

米基爾馬連奴上年8月由皇家蘇斯達加盟阿仙奴，季前操練受傷，休息1個月先至復出，原本表現平平無奇，但由於多位前鋒受傷，主帥阿迪達將呢位28歲西班牙國腳推前擔任前鋒，反而效果極佳，頻頻取得重要入波，包括早前2場「倫敦打吡」對車路士、富咸都建功，協助阿仙奴勝出。

兵工廠喺歐聯8強兩回合攻入皇馬5球，除咗迪格蘭賴斯射入2球罰球之外，其餘3個入波都同米基爾馬連奴有關，阿仙奴僅花費3,160萬鎊(約3.16億港元)就買到呢位「全能戰士」，絕對係球隊近年最佳收購。