厲害了！李華度囝囝想代表國足

巴西名宿李華度嘅囝囝李華甸奴今年2月加盟中甲球隊青島紅獅，引起球迷關注，呢位29歲「星二代」更加豪言願意等5年，符合歸化資格後，代表中國隊比賽。

雖然擁有1位球王級爸爸，但李華甸奴事業發展平平，出道以來大部分時間喺保加利亞、羅馬尼亞、波蘭搵食，最為人津津樂道係佢同老竇李華度曾於2015年一齊效力巴乙球隊Mogi Mirim，並同場入波。

司職前鋒嘅李華甸奴今年2月離開羅馬尼亞球隊Farul ConstanTa，加盟青島紅獅，佢話之所以前往中國搵食，全因被青島紅獅管理層打動：「球會會長非常關心我嘅家人，安排我嘅兒子讀國際學校，青島居住環境亦非常好，加盟紅獅係我第一選擇。」

對於以往有多位巴西球員歸化代表中國隊，李華甸奴話自己都願意：「我今年29歲，5年後34歲，都可以為中國效力。」不過，唔少網民認為，李華甸奴年紀已唔細，加上實力一般，恐怕未必可以喺中國踢到5年波。