神鋒對決　奧巴美揚又贏C朗

周六(19日)凌晨沙特阿拉伯職業聯賽神鋒對決，奧巴美揚頂入致勝1球，協助艾卡迪沙主場以2比1擊敗有C朗助陣嘅艾納斯，兩隊今季2次交鋒，奧巴美揚都有波入「雙殺」艾納斯，完勝C朗。

艾卡迪沙上半場35分鐘憑艾安馬單刀射入打開紀錄，其後戰局陷入膠着，直至比賽末段再次掀起高潮，84分鐘沙迪奧文尼入波為艾納斯扳平1比1，但3分鐘之後，奧巴美揚接應隊友傳中，頂入絕殺艾納斯。呢位35歲前阿仙奴射手首循環對艾納斯，同樣射入致勝1球，協助艾卡迪沙贏2比1，今仗又出現相同劇本。

至於C朗踢足全場，但表現欠佳，被奧巴美揚搶晒風頭，艾納斯聯賽3連勝斷纜，排第3位，落後榜首伊蒂哈德8分，剩下6輪聯賽爭標機會渺茫。今季新升班嘅艾卡迪沙排第5位，成績令人驚喜。