利物浦向迪亞斯攤牌：唔續約就賣

利物浦近期已經同2位主力穆罕默德沙拿、華基爾雲迪積克(VVD)續約，下一步將會同前鋒路易斯迪亞斯傾續約，根據英國媒體《Football Insider》爆料，紅軍向呢位28歲哥倫比亞國腳攤牌，如果唔續約，今夏就會將佢賣走。

據悉雙方談判過程最大分歧係薪酬問題，路易斯迪亞斯屬於隊內「低薪一族」，現時周薪只有5.5萬鎊，要求增加至15萬鎊(約150萬港元)，但利物浦會方開出12萬鎊周薪，導致一直傾唔掂數。

路易斯迪亞斯2022年1月由波圖加盟利物浦，總共上陣144場入39球，包括今季45次披甲入15球及8次助攻，屬於鋒線重要人物，認為自己應該獲得更佳待遇。不過，紅軍同沙拿、VVD高薪續約後，難以向路易斯迪亞斯提供肥約，恐怕滿足唔到佢要求。

路易斯迪亞斯仲有2年合約在身，盛傳西甲勁旅巴塞隆拿及多支沙特阿拉伯豪門有意簽入佢，利物浦要搵買家並唔困難。