加拿祖受多間豪門注視　曼聯定價7億

曼聯阿根廷翼鋒阿歷真度加拿祖今年初幾乎離隊，最終唔成事，據報除咗拿玻里同車路士對佢有興趣，近日馬德里體育會同利華古遜都有意加入爭奪，曼聯決定加價，定價高達7,000萬鎊(約7億港元)。

加拿祖一直係曼聯套現重點人選，早前冬季轉會窗，車路士同拿玻里都斟介加拿祖，而且傾到深入階段，不過球迷反對加拿祖去車路士而作罷，至於拿玻里其實已經好接近，出價5,000萬歐元(約4.4億港元)，但曼聯堅持要5,000萬鎊(約5億港元)，結果交易告吹。

今夏轉會窗就快到，馬體會同利華古遜有意加入爭奪加拿祖，其中馬體會屬「阿根廷幫」大戶，加拿祖來投肯定如魚得水，球員本人已表態願意加盟，至於利華古遜亦對加拿祖有興趣，而且準備巨額資金與各大豪門競爭。

曼聯出售加拿祖底價為5,000萬鎊，依家見多隊有興趣，轉會費調整至7,000萬鎊，希望獲得更多資金重建陣容。