失寵屈堅斯化怒火為力量　維拉4比1炒紐卡素

英超前5名(歐聯資格)爭逐超級激烈，普遍認為紐卡素、曼城、諾定咸森林、車路士同阿士東維拉5強將爭奪3個席位，原本形勢最差嘅阿士東維拉，周日(20日)凌晨主場4比1大炒紐卡素，暫時壓倒踢少1場嘅車路士升上第6位，但同第3嘅紐卡素只差2分，形勢非常激烈。

維拉啱啱喺歐聯贏波出局，今場前5爭逐關鍵戰氣勢未減，開波唔夠1分鐘就由奧尼屈堅斯打開紀錄，呢位前鋒之後勁射中楣，轉頭紐卡素就憑法比安舒哈近門頭槌追平。維拉仍佔上風，下半場再靠伊恩馬特臣、丹般恩嘅烏龍波以及阿馬度奧拿拿埋齋，順利大勝4比1完場。

近期被貶後備嘅屈堅斯，今場有2場攻門被門框所阻，仍有1入波同1助攻，佢賽後表明對突然失寵感到憤怒，屈堅斯表示：「歐聯對巴黎聖日耳門兩回合，我只係踢20分鐘，我唔想講大話，對於冇得踢我覺得好嬲。冇得參加最大嘅舞台令人失望，維拉有今日，我有好大功勞，我唔想被憤怒影響，我會將佢轉化為力量。」