狼隊奧脫福贏波　曼聯落敗卻護級成功

周日晚(20日)英超，曼聯又輸一場，主場0比1不敵狼隊，聯賽累積輸15場刷新隊史英超輸波場次紀錄，亦係狼隊45年來首次一季內雙殺曼聯，同時由於葉士域治輸波，狼隊同曼聯一齊「上岸」，提前護級成功。

曼聯今場攻勢較多，但冇咩用，中框射門只得2次，同狼隊一樣，戰至下半場77分鐘，沙拉比亞碧咸上身，禁區頂主射罰球彎過人牆死角入網，曼聯門將奧拿拿飛到盡都摸唔到，狼隊亦憑呢個全場唯一入球贏波。狼隊英超時代重未一季內2次擊敗曼聯，對上一次要數到1979至80年球季，距今45年。

曼聯上季輸14場排第8，已經係當時隊史輸波最多紀錄，今季聯賽仲有5輪，曼聯已經輸咗15場，打破上季輸波場次紀錄，曼聯最後5輪聯賽對手計有般尼茅夫、賓福特、韋斯咸、車路士同阿士東維拉，似乎仲可以破紀錄。

不過曼聯已經打入歐霸盃4強，魯賓艾摩廉嘅策略係放棄聯賽，全力養精蓄銳爭盃，如果成功捧盃取得歐聯入場券，咁就乜都番晒嚟。