皇馬補時絕殺畢爾包　保西甲爭標希望

喺歐聯8強出局嘅皇家馬德里，周一(21日)凌晨西甲惡鬥畢爾包，苦戰至補時憑費達歷高華維迪轟入世界波，主場1比0「絕殺」贏波，依家落後榜首巴塞隆拿4分，保住爭標一線希望。

皇馬今場有基利安麥巴比停賽，進攻顯得相當疲憊，半場悶戰打和0比0。下半場皇馬加強進攻，祖迪比寧咸兩次頭槌幾乎入波，直到最後補時3分鐘，華維迪禁區窄位精彩窩利抽入遠柱，幫皇馬全取3分。

盛傳夏季將離隊嘅教練安察洛堤，賽後表示唔會放棄爭冠：「我哋同球迷都相信，皇馬今季仍然可以捧盃，好消息係今場冇失波，下半場表現亦都大有改善，希望可以繼續保持。」

皇馬周四(24日)凌晨會作客基達菲，周日(27日)凌晨就會喺西盃決賽同巴塞隆拿對壘，據報受傷嘅基利安麥巴比可以趕及上陣。