激！5強相差2分　馬利斯卡：車仔今季好成功

英超「前5」爭逐白熱化，由第3位去到第7位之間只係相差2分，預計紐卡素、曼城、車路士、諾定咸森林同阿士東維拉5強，只有3隊可能拎到歐聯參賽資格。車路士周日(20日)作客2比1反勝富咸，領隊馬利斯卡表示無論入唔入到前5，今季成績已經算好「成功」。

車路士作客富咸上半場先失，以為將會率先「退出」歐聯爭逐戰，小將泰列基佐治就喺83分鐘追平，加上柏度尼圖喺補時3分鐘絕殺，助車路士全取3分，依家有57分同維拉、森林(踢少1場)並列，僅落後紐卡素同曼城2分及1分，邊3隊可以霸佔前5位變數極大。

雖然有冇得踢歐聯仲係未知數，但馬利斯卡賽後就自誇今季好成功：「車路士之前連歐聯區都入唔到，今季就一直喺呢個位置，柏度尼圖嘅絕殺唔會改變我對今季睇法，車路士已經好成功，如果最後拎埋歐聯席位，就係更加成功。」馬利斯卡今場喺柏度尼圖入波後，因為慶祝過激拎到黃牌，周六(26日)主場對愛華頓要自動停賽。