法甲扭波王拒續約　巴塞隆拿平價搶人

西甲勁旅巴塞隆拿火力強大，不過勁人永遠唔嫌多，據報佢哋準備喺夏天收購里爾翼鋒薩高華，呢位「科索沃美斯」早前拒絕里爾新合約，今個夏天將被兜售，巴塞有望平價搶人。

據西班牙《每日體育報》報道，巴塞總監迪高一向係薩高華「粉絲」，呢位右翼盤扭技術高超，今季雖然受到連番傷患影響，但9場歐聯亦有4個入波。

26歲嘅薩高華同里爾合約去到2026年夏天，但佢最近拒絕球會續約，里爾為免明年人財兩失，將被逼喺今夏放人，預計談判「起標價」只需3,000萬歐元。

報道指意甲勁旅拿玻里亦想搶人，希望以佢代替冬季離隊嘅基華拉斯基利亞，不過薩高華個人就更想去巴塞大展身手。