史上最強維拉！「管理員」麥甘尼擔心被刪除

阿士東維拉近年成績起飛，今屆重返歐聯即殺入8強，冬季轉會窗更引入拉舒福特、馬高阿辛斯奧等球星，負責做維拉「群組管理員」嘅約翰麥甘尼表示，依家嘅維拉陣容係「史上最強」，擔心終有一日要將自己喺群組「移除」。

麥甘尼喺2022年謝拉特委任做隊長，佢亦係球員通訊群組管理員，佢早前受訪表示：「依家個陣容可能係史上最強，將咁多大牌球星加入群組感覺好特別，過去5年我諗加入咗50個球員，又移除咗50個球員，最近入Group嘅係拉舒福特、馬高阿辛斯奧同唐耶爾馬倫呢種級數，對球會係好事。」

蘇格蘭國腳麥甘尼指維拉已脫胎換骨：「依家嘅球員都想效力維拉、想踢歐聯，我哋依家嘅任務係維持呢種高水平，希望之後會有更多球星希望加入維拉，或者應該希望新球員唔好太勁，我唔想有一日要將自己喺群組移除。」