麥總黑氣纏身　卡昂降落法丙

基利安麥巴比今季諸事不順，正當皇家馬德里歐聯出局之際，佢家族擁有嘅法乙球隊卡昂，亦喺護級大戰淨吞馬堤古斯3蛋，提前3輪護級失敗，來季降落法丙。

麥巴比家族去年夏天買入卡昂80%股份，並投資2,000萬歐元組軍及償還部分債務，不過入主以來球隊成績未好過，長期喺榜下游徘徊，最終降班收場。

法國傳媒報道，雖然麥巴比家族仍然繼續持有卡昂，但來季班費肯定會大減，主教練同多位主力都會離隊，幾乎由零開始，麥巴比打算喺卡昂大搞青訓，將從U17同U19做起，希望由法丙重上法乙。

至於「麥總」今季喺皇馬亦不似預期，年初失落西超盃，近日歐聯出局，西甲仍然落後，嚟緊西班牙盃決賽又要對死敵巴塞隆拿，有可能4隻盃都冇晒，真正「四大皆空」，轉會皇馬首季如此遭遇實在始料不及。