阿朗素帶兵過皇馬　利華中堅自己官宣離隊

沙比阿朗素今夏過檔執教皇馬，已經傳到通晒天，利華古遜中堅莊拿芬泰希更自己官宣，今夏將會離隊，雖然佢冇講明下一站去邊，但不難估計係跟隨主帥沙比阿朗素一齊過檔皇馬。

29歲德國國腳中堅莊拿芬泰希，效力利華古遜長達10年，佢近日突然表示，已經通知利華古遜高層，今個夏天約滿後離隊，佢話：「係呀，我會離開利華古遜，我已經通知咗球會。」

講到下一站去邊，泰希就話抱開放態度：「暫時未定，但由我決定唔續約嗰陣開始，一切都好明確，呢個決定唔會改變。」

自由身嘅泰希有好多選擇，跟隨沙比阿朗素去皇馬係其中之一，另外巴塞、利物浦、熱刺都對佢感興趣，可謂大把出路。