森林擊敗熱刺　歐聯入場券之爭激爆

周二(22日)凌晨英超，諾定咸森林作客以2比1擊敗熱刺，升上第3位，但其實只係領先第7位阿士東維拉3分，撇開前2位嘅利物浦及阿仙奴，另外5隊要為餘下3個歐聯席位爭崩頭。

諾定咸森林反客為主，發動閃電戰，中場艾利洛安達臣遠射入網打開紀錄，轉個頭基斯活特曾經射門入波，但因為越位食「詐胡」。不過，呢位33歲老將好快又有機會，安東尼艾蘭加左路傳中，基斯活特頂入成2比0，當時只係開賽16分鐘。

其後戰局陷入開鋸，臨完場前，熱刺憑李察利臣頭槌破網，追至1比2，但為時已晚。諾定咸森林結束聯賽2連敗，現時有60分，領先第4位紐卡素1分，曼城以58分排第5位，車路士及阿士東維拉同得57分，呢5隊鬥得難分難解。

今季英超前5位可以參加下屆歐聯，除咗利物浦及阿仙奴位置比較穩陣之外，第3至7位球隊要喺餘下5輪聯賽，全力搶分，力爭搭上歐聯尾班車。